XOGANDO A APRENDER

 Na nosa aula aprendemos lectoescritura dun xeito moi especial: xogando, manipulando e partindo do que máis nos interesa 💛

Utilizamos propostas lúdicas nas que os nomes propios teñen un papel moi importante, xa que son palabras moi significativas para o alumnado. A partir deles, imos recoñecendo letras, ordenándoas, formando palabras, xogando cos sons… sempre a través de materiais manipulativos que nos permiten experimentar e aprender facendo.

Por exemplo, xogamos a construír o noso nome con letras móbiles, a buscalo entre outros nomes da aula, a ordenar as súas letras cando están descolocadas ou a contar cantas letras ten. Tamén facemos xogos de asociación imaxe-palabra, buscamos palabras que comezan polo mesmo son, ou clasificamos palabras segundo a súa letra inicial.

Antes de comezar a ler e escribir como tal, é fundamental traballar unha serie de prerrequisitos que son a base de todo este proceso. Na aula desenvolvemos a conciencia fonolóxica (escoitar e identificar sons), a discriminación visual (diferenciar letras e palabras), a memoria, a atención, a orientación espacial (direccionalidade da escritura), a motricidade fina e a coordinación óculo-manual.

Deste xeito, aprender a ler e escribir convértese nun proceso natural, motivador e respectuoso cos ritmos de cada neno e nena, no que o máis importante é construír unha boa base mentres desfrutamos aprendendo.

Seguiremos actualizando. . . 

Biquiños

PROPOSTAS ARTÍSTICAS DE PRIMAVERA

 

Partindo do grande interese que o noso alumnado amosa polos dinosauros 🦖 e aproveitando a chegada da Pascua, momento no que moitos e moitas contaban con ilusión que lles regalaban ovos ou participaban en búsquedas de ovos de Pascua 🥚, decidimos unir ambos intereses nunha proposta moi creativa no Contexto de Arte.

Así naceron os nosos “ovos de Pascuasaurio”: unha actividade na que, paso a paso, aprendemos a debuxar e decorar ovos moi especiais, cheos de cor e imaxinación, combinando o mundo dos dinosauros coa tradición da Pascua.

Foi unha experiencia moi motivadora na que, ademais de desenvolver a creatividade, traballamos a atención, a motricidade fina e o gusto por expresarnos a través da arte.

Aproveitando tamén o interese que espertou no alumnado o lanzamento á lúa da nave Artemis 2 🚀🌕, levamos esta motivación ao Contexto de Arte cunha proposta moi especial: aprender a debuxar a nosa propia versión da nave.

Seguindo un modelo en grande que iamos construíndo paso a paso entre todos e todas, o alumnado foi reproducindo o debuxo de maneira individual, atendendo ás indicacións e observando con detalle cada parte da nave.

A través desta actividade, non só desfrutamos creando, senón que tamén traballamos aspectos moi importantes como a atención, a escoita activa, a orientación espacial (arriba/abaixo, dentro/fóra, proporcións…), a coordinación óculo-manual e a capacidade de seguir instrucións secuenciadas. Ademais, favoreceuse a autonomía e a confianza nas propias posibilidades ao comprobar que, paso a paso, eran quen de realizar un debuxo cada vez máis elaborado.

Foi unha experiencia moi motivadora na que combinamos ciencia, imaxinación e arte… e na que nos sentimos un pouco máis preto da lúa! 🌕

Seguiremos actualizando. . .

Biquiños

CONTEXTO DE CASA-POBO: XOGANDO E APRENDENDO CON REGLETAS

 Traballar as matemáticas de xeito manipulativo en Educación Infantil é moi importante para que os nenos e nenas poidan entender mellor o que están a aprender. A través de materiais como as regletas, teñen a oportunidade de experimentar, tocar, comparar e descubrir por si mesmos, pasando pouco a pouco do concreto ao abstracto dun xeito natural.

As regletas axúdannos a explorar conceptos como as cantidades, as relacións entre números, as seriacións ou mesmo as primeiras operacións, favorecendo o razoamento lóxico e a resolución de pequenos retos de forma lúdica e motivadora. Así, as matemáticas convértense nunha experiencia máis próxima, activa e, sobre todo, divertida.

Reto 1: facer a escaleira que sube coas regletas atopando o valor de cada unha e asociando cada cor co seu valor.

Reto 2: As regletas están desordenadas, caéronse da escaleira e por riba pasou un rato cunha goma de borrar na cola e quitoulles a cor! Agora. . . como sabemos cal é cada unha?

Reto 3: Sumamos con regletas! Comeza a festa!

Seguiremos actualizando. . . 

PROPOSTAS ARTÍSTICAS DE INVERNO

A piques de despedir o inverno, queremos amosarvos algunhas das propostas tan chulas que levamos a cabo no Contexto de Arte durante esta estación.

Convertémonos en pequenos artistas creando un collage moi especial: representamos as nubes con algodón, a choiva con grafismos en forma de trazos verticais e puxemos en práctica o noso control óculo-manual e a precisión, intentando non trazar liñas por riba das figuras humanas que aparecían co paraugas.

Ademais, tamén traballamos a lectoescritura e a motricidade fina recortando, ordenando e pegando as letras para formar a palabra inverno.

E como o inverno é tempo de frío… moi frío! , aprendemos a debuxar paso a paso un animal que vive onde as temperaturas son baixísimas: o pingüín 🐧. Seguimos as indicacións con moita atención e… conseguímolo!

Desfrutamos moitísimo destas propostas, aprendendo e creando ao mesmo tempo.

Seguiremos actualizando. . .

EXPERIMENTOS

 Durante este curso, unha vez ao mes, no Contexto de Xogos-Científico convertémonos en pequenos científicos e científicas realizando distintos experimentos moi interesantes, cos que achegamos a ciencia aos mais pequenos/as e aprendemos moitas cousas.

En xaneiro, fixemos un experimento no que simulamos unha tormenta nun vaso empregando unha vela e un perfume con alcohol, o que nos permitiu observar diferentes reaccións e falar sobre este fenómeno.

Tamén levamos a cabo en febreiro outro experimento no que tentamos reproducir placas de xeo e o seu movemento e separación utilizando talco e xabrón de pratos. A partir desta actividade, falamos e aprendemos sobre a tensión superficial, o desxeo e a importancia de coidar o noso planeta.

Por último, neste mes de marzo achegámonos ao mundo dos volcáns. Coñecemos como son e como funcionan, e mesmo fixemos a nosa propia erupción volcánica empregando bicarbonato e vinagre branco, o que resultou ser unha experiencia moi divertida e sorprendente.

Seguiremos actualizando. . .

DÍA DA MULLER 2026

 Con motivo do Día da Muller, realizamos unha actividade especial na biblioteca do centro a través dunha sesión de contacontos, na que coñecemos a historia de Vagalume.

Tras a lectura, mantivemos unha pequena conversa para reflexionar sobre o conto e compartir as nosas ideas e impresións.

Para rematar, o alumnado expresou o que máis lle gustou mediante un debuxo, dando forma ás súas emocións e aprendizaxes.

Ademais, falamos dunha muller aventureira e valente como foi Amelia Earhart, coñecendo un pouco da súa historia e do seu exemplo.A través da súa biografía, reflexionamos sobre a importancia de loitar polos propios soños, superar as dificultades, confiar nas propias capacidades e entender que as mulleres tamén poden acadar grandes retos en calqueira ámbito.

Seguiremos actualizando. . . 

DÍA DE ROSALÍA: CÉ , ORQUESTRA PANTASMA.

 Con motivo do Día de Rosalía, tivemos na escola a sorte de gozar do concerto de Cé Orquestra Pantasma, que nos ofreceu unha actuación moi especial.

Foi un concerto moi participativo, cheo de música en galego, no que o alumnado puido cantar, bailar e implicarse en todo momento. Disfrutamos moitísimo desta experiencia, que nos permitiu achegarnos á nosa lingua e cultura dun xeito lúdico e moi divertido.

 Seguiremos actualizando. . .

RICA MEL !

No mes de febreiro recibimos no colexio a visita dun apicultor, que nos achegou ao fascinante mundo das abellas e nos explicou moitas cousas sobre o seu traballo. Grazas á súa visita, o alumnado puido coñecer de primeira man como viven as abellas, como se organizan dentro da colmea e a importancia que teñen para o medio ambiente.

Foi unha experiencia moi enriquecedora, na que aprenderon de maneira próxima, práctica e motivadora, espertando a súa curiosidade e interese pola natureza e polo coidado dos seres vivos.

Seguiremos actualizando. . . 

 

Nadal 2025

Este Nadal a árbore da entrada de Infantil encheuse de maxia, cor e moito agarimo. Os nenos e nenas decorámola cos nosos propios adornos, que fixemos na casa coa axuda das nosas familias.

Cada adorno é único e especial, feito con ilusión, creatividade e moito amor. Grazas a todas as familias por colaborar e axudar a facer do noso cole un lugar aínda máis bonito neste Nadal.

Visitamos a biblioteca do colexio con moita ilusión e os ollos ben abertos, porque sabiamos que algo especial nos estaba agardando. Fomos alí para descubrir as trasnadas do elfo que nos visita cada Nadal e que sempre nos sorprende .

A biblioteca encheuse de maxia, sorrisos e moita emoción… porque cando chega o Nadal, todo pode pasar!

Agardamos con moitísima ilusión a visita ao colexio das Súas Maxestades os Reis Magos de Oriente, soñando coa súa chegada e coa maxia que sempre traen con eles. Os nosos corazóns estaban cheos de emoción para recibilos.

Despois, tomamos para merendar chocolate con churros, a nosa merenda tradicional de Nadal, coa que nos despedimos do cole o último día antes de comezar as vacacións.

Foi un momento moi doce e cheo de alegría, compartindo risas e celebrando xuntos a chegada do Nadal.

Para poñer o broche final ás celebracións, xuntámonos no ximnasio do colexio para celebrar o noso fin de ano infantil. Alí despedimos o ano comendo gusanitos coas doce badaladas, entre risas, emoción e moita festa.

Pasamos un ratiño moi divertido compartindo cos compañeiros e compañeiras, cheo de alegría e ilusión, perfecto para comezar o novo ano con bo pé.

Vídeo Felicitación Familiar Navidad Año Nuevo Christmas Elegante Rojo de Bibianaboedoedu

Seguiremos actualizando. . .

Feliz 2026

Pilar e Bibi